ந.பிச்சமூர்த்தியிலிருந்து எஸ்.ரா வரை – நூல் அறிமுகம்

ஆசிரியர்:- ஜீவி

வெளியீடு:- சந்தியா பதிப்பகம், சென்னை-83

தொலைபேசி:-044-24896979

பக்கம்:- 264  விலை – ரூ 225/-

பூவனம் ஜீவி அவர்கள் எழுதி வெளியாகியிருக்கும் மறக்க முடியாத தமிழ் எழுத்துலகம்,  'ந.பிச்சமூர்த்தியிலிருந்து எஸ்.ரா வரை,' என்ற புத்தகத்தை அண்மையில் வாசிக்கும் வாய்ப்புக் கிடைத்தது.

திரு ஜீவி அவர்களைப் பதிவுலகம் நன்கறியும்.  இதுவரை நான்கு சிறுகதை தொகுப்புகள் வெளிவந்திருக்கின்றன.  

திரு வை.கோபு சார், பத்து மாதம் பதிவுலகில் வெகு விமரிசையாக நடத்திய சிறுகதை விமர்சனப்போட்டியில் நடுவராக இருந்து கடமையுணர்வோடும், பொறுப்புணர்வோடும் செயல்பட்டவர்.

மறக்க முடியாத தமிழ் எழுத்துலகில், மணிக்கொடி காலத்தில் கோலோச்சியவர்கள் முதல், இன்றைய எஸ்.ரா வரை 37 எழுத்தாளுமைகளைப் பற்றியும், தமிழிலக்கியத்துக்கு அவர்தம் கொடை பற்றியும் பேசும் நூல் இது.

இப்பட்டியலில் கல்கி, நீல பத்மநாபன், கி.ரா., பிரபஞ்சன் போன்றோர் விடுபட்டது ஏமாற்றமளிக்கிறது என்றாலும், எழுத்தாளர்களின் எண்ணிக்கையை 37 ஆகக் குறைத்ததன் காரணம், நூலின் பக்க எண்ணிக்கை நெருக்கடியே என ஆசிரியர், தம் முன்னுரையில் குறிப்பிடுவது, ஏற்றுக்கொள்ளக் கூடியதாயிருக்கிறது.    

இதுநாள்வரை தமிழ் எழுத்தாளர்களைப் பற்றி, இது போன்றதொரு  தொகுப்பு நூல் வெளியாகியிருப்பதாகத் தெரியவில்லை.  என் ஐயம் உண்மையாக இருக்குமானால், இவ்வரிசையில் முதல் நூல் என்ற பெருமையை இது பெறுகிறது.

வேருக்கு நீர் ஊற்றிச் செழிக்கச் செய்தவர்கள் பிறந்த மண், அவர்தம் இயற்பெயர், வாழ்க்கைச்சூழல், இலக்கியத்துக்கு அவராற்றிய அரும்பணி ஆகியவை குறித்து, நம் இளைய தலைமுறையினர் அறியும்வண்ணம் ஆவணப்படுத்துவது, நம் தலையாய கடமையல்லவா?  இப்பணியை இந்நூல் திறம்படவே செய்கிறது.  முக்கியமாகத் தமிழிலக்கிய வரலாறு எழுத, இது பெரிதும் துணைபுரியும். 

    வாசித்து முடித்ததும், என் மனதில் பட்டவை:-

தமிழில் நிறைய வாசித்திருக்கிறோம் என்று இறுமாந்திருந்த எனக்கு, இன்னும் நான் கடக்க வேண்டிய தூரம் மிக அதிகம் என்ற உண்மை முகத்தில் அறைகிறது.

ஆசிரியரின் பரந்து பட்ட வாசிப்பும், இந்நூலை எழுத எடுத்துக்கொண்டிருக்கும் சிரத்தைகளும், என்னைப் பிரமிக்க வைத்தன. இளவயதில் வாசித்த பலவற்றை, மீள் வாசிப்பும் செய்திருப்பதால், பாத்திரங்களின் பெயர்களை ஒன்றுவிடாமல் பட்டியலிடமுடிகிறது.

மேம்பட்ட வாசிப்புத் திறனின் பயனாய், எழுத்தாளரின் மிகச்சிறந்த படைப்புகளைத் தேர்வு செய்து, நமக்கு அறிமுகம் செய்வதோடு, முக்கியமான பகுதிகளை ஆங்காங்கே கொடுத்து, நம்மைக் கைபிடித்து அழைத்துச் சென்று, தாம் ரசித்து மகிழ்ந்தவற்றை, நமக்கு அடையாளம் காட்டவும் ஆசிரியர் தவறவில்லை. ‘யான் பெற்ற இன்பம், பெறுக இவ்வையகம்!’

இலக்கிய கர்த்தாக்களின் ஆக்கங்களைப் பேசும் நூல் என்பதால் ஆசிரியரும், இலக்கியத்தரமான நடையைக் கையாண்டிருக்கிறார்.  தொடர்ந்த வாசிப்பு காரணமாக பெற்ற மேம்பட்ட ரசனையோடு, எழுத்தாளராயுமிருப்பதால், இது சாத்தியமாயிருக்கிறது.  என்னைப் பெரிதும் கவர்ந்த விஷயம் இது.

எழுத்தாளர் ஒவ்வொருவரின் அறிமுகமும், ஒவ்வொரு விதம்;  ஒன்று போல் இன்னொன்றில்லை என்பதால், அடுத்தடுத்து வாசிக்கும்போது நமக்குச் சலிப்பு ஏற்படவில்லை.  சொல்லப்போனால், இவர் அறிமுகம் செய்யும் விதம், மிக சுவாரசியமாயிருக்கிறது. 

எடுத்துக்காட்டுக்கு நான் ரசித்தவற்றில் சில:-

(வாழ்க்கையின் தரிசனத்தில் நுட்பமாக நெஞ்சில் மின்னலென மின்னிவிட்டுப் போகும் உணர்வைப் பறிகொடுத்துவிடாமல் பொத்திக் காப்பாற்றி, அவற்றிற்குச் சிறுகதை சட்டையிட்டு உலாவவிட்டிருக்கிறார்.) கு.ப. ரா – பக் 18

(ஆலாபனை, மேல்கீழ் சஞ்சாரம் என்று விஸ்தாரமாக பாடத்தொடங்கிய பாடகர், சரணத்துக்கு வரும் போது அவசர அவசரமாக முடித்துக்கொண்டது மாதிரியான உணர்வு.  ஆனால் அவர் தரும் அந்த முடிவும், பளீரென்று மின்னல் வெட்டாய் நிகழ்ந்து, இதற்கு மேல் விவரிக்க என்ன இருக்கிறது என்கிற உணர்வையும் தோற்றுவிக்கும்) புதுமைபித்தன் பக் 30 

(தரிசித்த தரிசன தத்ரூபத்தின் விகசிப்பு, அப்படியே அதே வழிசலுடன்…சிந்தாமல், சிதறாமல், சிந்தா நதியாய்… அதே துள்ளலுடன், அதே துவளலுடன், அதே நெகிழ்தல், குழைதலுடன், அதே பரவசத்துடன், அதே சூட்டோடு பரிமாறியிருக்கிறார்.  தன் நெஞ்சிலிருந்து பிறர் நெஞ்சுக்குக் கூடு விட்டுக் கூடு பாயச் செய்திருக்கிறார்) லா.ச.ரா (பக் 55).

'புதுப்பாதை வகுத்த புதுமை பித்தன்', 'நினைவு நதியில் வண்ணதாசன்', 'கொஞ்சு தமிழ் நாஞ்சில் நாடன்,' 'எண்ண ஓவியன் வண்ணநிலவன்,' 'எழுத்துப்பயணி எஸ்.ரா.' என அழகிய கவிதையாய்த் தலைப்புகள்!.

புதிதாக நான் தெரிந்து கொண்ட செய்திகள் ஏராளம்; அவற்றுள்

இளவயதிலேயே கணவனை இழந்த சகோதரிக்கு, அந்நாளிலேயே மறுமணம் செய்து வைத்த புரட்சியாளர் கு.ப.ரா.  சகோதரியும் புகழ் பெற்ற எழுத்தாளர்;

புரட்சிக்கவிஞரின் புகழ் பெற்ற, ‘தமிழுக்கும் அமுதென்று பேர்,’ என்ற கவிதையை, முதன்முதலில் அச்சுக்கோர்த்தவர் எழுத்தாளர் விந்தன்,

எனக்குத் தெரியப்படுத்தாமல், என் கதையில் எந்தப் பகுதியையும் நீக்கக்கூடாது என்று ஜெயகாந்தன் போட்ட நிபந்தனைக்கு,  ஒப்புக்கொண்ட விகடன்!

வண்ணதாசனின் இன்னொரு பெயர் கல்யாண்ஜி ஆகியவை குறிப்பிடத்தக்கவை. 

37 தமிழ் எழுத்தாளர்களின் படைப்புகளினூடேயான ஒரு கழுகு பார்வையே, இதன் பக்கங்களாகி இருப்பதாக ஆசிரியர் முன்னுரையில் கூறியிருப்பது மிகச் சரி. 

நமக்குத் தெரியாத, நாம் தவற விட்ட நல்ல பல ஆக்கங்களை,  அறிமுகம் செய்து, அவற்றை எப்படியாவது ஒரு முறை வாசித்துவிட வேண்டும் என்ற உணர்வை, நமக்கு ஏற்படுத்துவதில் ஆசிரியர் வெற்றி பெற்றிருக்கிறார். 

தமிழில் இது போன்ற தரமான நூல்கள், அடுத்தடுத்து வெளிவர நாம் வரவேற்பு நல்க வேண்டும் என்பது என் வேண்டுகோள்.

வாசிப்பு சுகானுபவத்தை வாரி வழங்கிய ஆசிரியருக்கு நன்றி!

நன்றியுடன்,

ஞா. கலையரசி